काठमाडौं– बलोच मानव अधिकार अभियन्तालाई रिहा गर्न माग गर्दै पाकिस्तानको बलोचिस्तान प्रान्तको राजधानी क्वेट्टामा प्रदर्शन गरिएको छ । बलोच मानव अधिकार अभियन्ता डा. महरंग बलोचलाई रिहा गर्न माग गर्दै प्रदर्शन गरिएको हो ।

क्वेट्टाको शाहवानी रंगशाला नजिकै आयोजित प्रदर्शनमा हजारौँ बलोच अभियन्ताहरुको सहभागिता रहेको बलोचिस्तान पोस्टले जनाएको छ । उनीहरुले महरंग बलोच र अन्य राजनीतिक आस्थाका बन्दीहरुलाई रिहा गर्न माग गरेका थिए ।

प्रदर्शनका क्रममा प्रहरीले हस्तक्षेप गरेको जनाइएको छ । यस क्रममा दर्जनौँ प्रदर्शनकारी पक्राउ परेका थिए । केही समयअघि डा. बलोचलाई सुरक्षाकर्मीले नियन्त्रणमा लिएका थिए ।

बलोचिस्तानमा पछिल्ला केही वर्षयता गैरन्यायिक हत्या, जबरजस्ती बेपत्ता, अपहरणजस्ता घटना बढ्दै गएको बताइन्छ । पृथकतावादी गतिविधि नियन्त्रण गर्न भन्दै पाकिस्तान सरकारले सो क्षेत्रमा ठूलो सङ्ख्यामा सेना परिचालन गरेको छ ।