काठमाडौं– प्रतिनिधिसभाका दुई ठूला दल मिलेर बनेको सरकारले सत्ता साझेदार नेपाली कांग्रेस र नेकपा एमालेका शीर्ष नेताद्वयका गृहजिल्लाहरूमा महत्वकांक्षी परियोजना अघि सारेको छ ।

सरकारले आगामी आर्थिक वर्षका लागि कांग्रेस सभापति शेरबहादुर देउवा र एमाले अध्यक्ष (प्रधानमन्त्री) केपी शर्मा ओलीको गृहजिल्लामा क्रमशः विमानस्थल र अन्तर्राष्ट्रिस्तरको आधुनिक रंगशाला निर्माणको परियोजना अघि सारेका हुन् ।

संघीय संसद्का दुवै बैठकको संयुक्त बैठकमा आगामी आर्थिक वर्षका लागि तयार गरिएको बजेट प्रस्तुत गदै अर्थमन्त्री विष्णु पौडेलले देउवाको गृहजिल्ला डडेल्धुराको अजयमेरुमा विमानस्थल निर्माणका लागि विस्तृत अध्ययन गरी आयोजना प्रतिवेदन तयार गरिने बताए ।

‘तेह्रथुमको चुहान डाँडा, डडेल्धुराको अजयमेरु र उदयपुरको सगरमाथा विमानस्थलको विस्तृत अध्ययन गरी आयोजना प्रतिवेदन तयार गरिने छ,’ अर्थमन्त्री पौडेलले भने ।

उनले प्रधानमन्त्री ओलीको गृहजिल्ला झापाको दकममा अन्तर्राष्टियस्तरको आधुनिक रंगशाला निर्माण गर्ने पनि बताए । अर्थमन्त्री पौडेलले काठमाडौंको मूलपानी लगायत मोरङ, कैलाली र रुपन्देही जिल्लामा निर्माणाधीन रंगशालाका लागि ४२ करोड विनियोजन गरिएको बताए ।