काठमाडौं- प्रमुख प्रतिपक्षी नेकपा माओवादी केन्द्रले भिजिट भिसा प्रकरणमा मुछिएका गृहमन्त्री रमेश लेखकको राजीनामा नआएसम्म संसद् चल्न नदिने अडान लिएको छ ।

बिहीबार बसेको संसद् बैठकमा माओवादी केन्द्रका प्रमुख सचेतक हितराज पाण्डेले विशेष समय लिएर बोल्दै यस्तो अडान सार्वजनिक गरेका हुन् ।

‘भिजिट भिसा प्रकरणले जसरी विषयवस्तु ल्यायो त्यही आधारमा हामीले गृहमन्त्री लेखकको राजीनामा मागेका हौँ’, उनले भने, ‘हिजो गृहमन्त्रीले पत्रकार सम्मेलनमा कर्मचारीबारे जेजे विषय राख्नु भयो, ती सबै हामीले सुन्यौँ । बदमासी भए भ्रष्टाचारी कर्मचारीलाई कारबाही हुनुपर्छ । यो विषयले हामीलाई गम्भीर बनाएको छ ।’

पाण्डेले जेठ १५ गते बजेट ल्याउनै पर्ने संवैधानिक बाध्यता भएकाले संसद् चलाउन विशेष व्यवस्था गरिएको बताए । ‘संविधान कार्यान्वयन गर्न हामी लागिरहनुपर्छ । आज टेबुल गर्ने विषय वस्तुका लागि मात्रै सदन अघि बढाउन दिएका छौँ’, उनले भने, ‘त्यसबाहेक अरू कुनै काममा सदन अघि बढाउन नदिने निर्णय गरेका छौँ । भ्रष्टाचारको विषयवस्तुले हामी नेपालीको शीर निहुरिएको छ। सरकारले भ्रष्टाचारलाई नरोके हामी सशक्त रुपमा अघि बढ्छौँ ।’

पाण्डेले पूर्वराजा ज्ञानेन्द्र शाहसहितले गरेको आन्दोलनको तीव्र विरोध जनाएका छन् । उनले गणतन्त्रका लागि सबै दल एकजुट हुनुपर्ने पनि बताए ।