बार्सिलोना – स्टार फुटबल खेलाडी लामिन यामलले बार्सिलोनासँग थप ६ वर्षका लागि सम्झौता गरेका छन्। स्पेनका १७ वर्षीय विङ्गरको सम्झौता सन् २०२६ मा सकिने भएपछि सन् २०३१ सम्मका लागि लम्ब्याइएको छ।

सन् २०२३ मा १५ वर्षको उमेरमा बार्सिलोनामा डेब्यु गरेका उनले हान्सी फ्लिकको प्रशिक्षणमा रहेर बार्सिलानालाई ला लिगा, कोपा डेल रे र स्पेनिस सुपर कपको उपाधि जिताइ सकेका छन्।

मंगलबार क्लबका अध्यक्ष हुँवा लापोर्टा र निर्देशक डेकोको उपस्थितिमा यामलले नयाँ सम्झौतामा हस्ताक्षर गरे।

११५ खेलमा २५ गोल गरेका उनी क्लबको इतिहासमा नै ला लिगा, कोपा डेल रे तथा स्पेनिस सुपर कपमा गोल गर्ने सबैभन्दा कान्छा खेलाडी हुन्। जुलाईमा १८ वर्ष पुरा हुने यामल क्लबका लागि १०० खेल खेल्ने सबै भन्दा कान्छा खेलाडी हुन्। स्पेनको राष्ट्रिय टोलीबाट उनले १९ खेल खेलेका छन्।

सन् २०२४ को युरो कपको फाइनलमा उनी सहितको स्पेनले इङ्गल्यान्डलाई २–१ ले हराउँदै उपाधि जितेको थियो।

पछिल्ला साता क्लबले प्रशिक्षक फ्लिक र ब्राजिलियन स्टार राफिन्हासँगको सम्झौता लम्ब्याइसकेको छ।