काठमाडौं– उपप्रधान तथा अर्थमन्त्री विष्णुप्रसाद पौडेलले संसदमा आज प्रस्तुत गर्ने भनिएको आर्थिक सर्वेक्षण अनिश्चित बनेको छ । 

प्रतिपक्षमा रहेका दलहरूले गृहमन्त्रीको राजीनामा माग गर्दै संसद् अवरुद्ध गरेपछि आर्थिक वर्ष २०८१/८२ को आर्थिक सर्वेक्षण कार्यतालिका अनिश्चित बनेको हो ।

आज प्रतिनिधिसभामा पर्यटन, ऊर्जा र वनमन्त्रीले मन्त्रालयगत प्रश्नोत्तर, कृषि समितिको प्रतिवेदन पेश गर्ने लगायतका कार्यक्रम रहेका थिए । प्रतिपक्ष दलहरूको संसद् अवरोधका कारण आज संसदको कार्यसूचीमा रहेका सबै कार्यक्रम प्रभावित बन्न पुगेका छन् ।

अर्थमन्त्रीको सचिवालयले प्रतिनिधिसभा अवरुद्ध भएको अवस्थामा आर्थिक सर्वेक्षण कसरी सार्वजनिक गर्ने भन्ने विषयमा अहिलेसम्म कुनै वैकल्पिक विषयमा छलफल नभएको खबरहबलाई जानकारी दिएको छ ।