काठमाडौं– इटालियन प्रहरीले पाकिस्तानी मूलका व्यक्तिहरुले चलाएको आपराधिक सञ्जाल ध्वस्त पारेका छन् । उनीहरुले दक्षिण एशियाबाट युरोपतर्फ मानिसहरुलाई तस्करी गर्दै आएका थिए ।

उनीहरुले ‘बाल्कन रुट’ भनिने मार्गबाट आप्रवासीलाई युरोपेली युनियनमा प्रवेश गराउँदै आएको जनाइएको छ । उक्त आपराधिक गिरोहमा संलग्न रहेको आरोपमा ७ जनालाई पक्राउ गरी हिरासतमा राखिएको छ । उनीहरुमाथि मानव तस्करी, हिंसा, अपहरण, चन्दा अशुली र डकैतीको आरोप लगाइएको छ ।

इटालीको केन्द्रिय कारवाही सेवा र ट्रिएस्तका सुरक्षाकर्मीले स्लोभेनिया, क्रोएशिया र बोस्नियाका प्रहरीसँगको सहकार्यमा उक्त गिरोहविरुद्ध कारवाही चलाएका थिए । पछिल्लो समय दक्षिण एशियाबाट युरोपमा मानव तस्करीको घटना बढ्दै गएको अवस्थामा इटालीमा यस्तो कारवाही सञ्चालन गरिएको हो ।