काठमाडौं– अमेरिकी प्रविधि कम्पनी एप्पलका आईफोन बनाउँदै आएको ताइवानी कम्पनी फक्सकनले भारतमा थप १ अर्ब ५० करोड डलर लगानी गर्ने भएको छ । फक्सकनको सिंगापुरमा रहेको शाखाले भारतमा युझान टेक्नोलोजीका १ खर्ब २७ अर्ब ७४ करोड भारतीय रुपैयाँ अर्थात् १ अर्ब ५० करोड अमेरिकी डलर बराबरका १२ अर्ब ७७ करोड कित्ता शेयर खरिद गर्नेछ ।

भारतको तामिल नाडु राज्यमा रहेको युझान टेक्नोलोजी फक्सकनकै मातहत छ । यसले एप्पलको आईफोनका लागि विद्युतीय सामान उत्पादनका साथै जडान पनि गर्दै आएको छ ।

अमेरिकी राष्ट्रपति डोनाल्ड ट्रम्पले चीनमाथि भन्सार शुल्क वृद्धि गरेपछि फक्सकनले भारतमा आईफोन उत्पादनमा जोड दिँदै आएको छ । रोयटर्सका अनुसा गत मार्च महिनामा एप्पलले भारतमा उत्पादन बढाएको छ ।

एप्पलले सो अवधिमा २ अर्ब अमेरिकी डलर बराबरका ६ सय टन आइफोन अमेरिकामा निर्यात गरेको जनाइएको छ । कोरोना भाइरसको महामारीसँगै विश्वव्यापी आपूर्तिचक्रमा देखिएको व्यवधान र भूराजनीतिक तनावका कारण पछिल्लो समय विश्वका महत्वपूर्ण कम्पनीहरु भारतमा लगानी गर्न आकर्षित भइरहेका छन् ।