काठमाडौं – अमेरिकी राष्ट्रपति डोनाल्ड ट्रम्प विभिन्न कारणले चर्चामा आइरहन्छ । विवादमा पर्ने त उनको पूरानो बानी नै हो ।

कहिले राजनीतिक कदम र कहिले अभिव्यक्तिले ट्रम्पलाई विवाद वा चर्चामा ल्याइहाल्छ । अहिले फेरि उनले अमेरिकी गायिका टेलर स्विफ्टमाथि गरेको टिप्पणी भाइरल भएको छ । यसले ट्रम्पलाई पुन: एक पटक चर्चामा ल्याएको छ ।

आफ्नो निजी सामाजिक सञ्जाल ट्रुथमा ट्रपले टेलर स्विफ्टबारे लेखेका छन्, ‘के कसैले ध्यान दिनुभएको छ- जबदेखि मैले म टेलर स्विफ्टलाई घृणा गर्छु भनेको थिएँ, तबदेखि उनी हट छैनन् ?’

एक गायिकामाथिको राष्ट्रपति ट्रम्पको टिप्पणीलाई लिएर सामाजिक सञ्जालमा विभिन्न कोणबाट तर्क भइरहेको छ । कसैले भने यसलाई ट्रम्पले चुनावी रिस फेरेको कोणबाट लिएका छन् ।

टेलर स्विफ्टले २०२४ को अमेरिकी राष्ट्रपति चुनावमा डेमोक्रेटिक उम्मेद्वार कमला ह्यारिसको खुला समर्थन गरेकी थिइन् ।

ट्रम्पको चुनावी टोलीले स्विफ्टको समर्थनलाई बेवास्ता गरे पनि पछि ट्रम्पले कडा रूपमा प्रतिक्रिया जनाएका थिए। त्यसयता स्विफ्टप्रति ट्रम्प नकारात्मक बन्दै आएका छन् ।