काठमाडौं – आईसीसी विश्वकप लिग–२ को स्कटल्याण्ड सिरिज अघिको अभ्यास खेलमा नेपाली राष्ट्रिय क्रिकेट टोलीले लगातार तेस्रो जित निकालेको छ ।

बिहीबार भएको अभ्यासमा नेपालले ग्लोसेस्टरशायरविरुद्ध ७३ रनको सानदार जित हात पारेको हो । यसअघि नेपालले न्युपोर्ट क्रिकेट क्लब र मेरिलेबोन क्रिकेट क्लबलाई पनि सहजै पराजित गरेको थियो ।

आजको खेलमा टस हारेर पहिला ब्याटिङ गरेको नेपालले निर्धारित २० ओभरमा ६ विकेट गुमाउँदै १९५ रन बनाएको थियो । नेपालका लागि कुशल भुर्तेलले सर्वाधिक ४६ रन बनाए।

यस्तै कप्तान रोहितकुमार पौडेल ३५ रनमा आउट हुँदा दीपेन्द्रसिंह ऐरीले ३२ रन , अनिलकुमार साहले २९ रन र आरिफ शेखले अविजित २२ रन बनाए। ग्लोसेस्टरशायरका डेभिड पेन र अमन राओले समान दुई विकेट लिए।

जवाफी ब्याटिङमा उत्रिएको ग्लोसेस्टरशायर १७.३ ओभरमा १२१ रनमा अल आउट भयो । नेपालका लागि सन्दीप लामिछाने, नन्दन यादव र बसिर अहमदले दुई दुई विकेट लिए ।

अब नेपालले आगामी जुन २ देखि स्कटल्याण्डमा विश्वकप लिग २ अन्तरगतको सिरिज खेल्ने छ ।