इलाम– इलामको पूर्वी क्षेत्रमा अवस्थित इलामको श्री अन्तु सूर्योदय र सूर्यास्तको दृश्यका लागि देशकै उत्कृष्ट गन्तव्यका रूपमा परिचित छ ।

ठाँउठाउँ बनाइएका होम स्टेमा अर्गानिक खाना पाइने भएकाले पर्यटकहरू यहाँ आकर्षित छन् । इलामको अन्तुडाँडामा सबैभन्दा पहिले घामको ज्योति पर्ने र यहाँबाट अत्यन्तै मनमोहक दृश्य देखिने भएकाले इलामसँगै नेपालका अन्य जिल्ला, भारतको दार्जिलिङ र बङ्गालबाट सूर्योदयको दृश्यावलोकनकै लागि पर्यटक आउने गरेका छन् ।

एकछिनमा तुवाँलो लाग्ने अनि एकैछिनमा झलमल्ल घाम लाग्ने यहाँको मौसमले पनि पर्यटकलाई लोभ्याएको छ ।

अन्तु पुग्नुको मज्जा सूर्योदय दृश्यावलोकन मात्रै छैन । यहाँबाट देखिने उत्तरका हिमशृङ्खला, कोणधारी धुपी–सल्ला, अलैंची, सिजन अनुसार फलफूल तथा अरू बालीले पनि आनन्द दिने गर्दछ ।

यहाँबाट झापाका फाँट, कन्याम, भारतको दार्जिलिङ, मिरिक, सिलिगुडीलगायतका बजार वरिपरिझैँ देखेपछि मनमा आनन्द आउने गर्छ ।

विभिन्न स्थानबाट दैनिक ५ सयदेखि १ हजारको हाराहारीमा पर्यटक अन्तुडाँडामा घाम झुल्केको हेर्न आउने गर्छन् ।