काठमाडौं– निर्वासनमा रहेको अफगान संसदकी सदस्य मरियम सोलाइमानखिलले भारतले पाकिस्तानविरुद्ध सञ्चालन गरेको सैन्य कारवाही स्वभाविक भएको बताएकी छिन् । हाल अमेरिकामा रहेकी उनले पाकिस्तानले लामो समयदेखि आतंकवादलाई पाल्दै आएको समेत बताएकी छिन् ।

इण्डियन इकोनोमिक अब्जर्भरले उनलाई उद्धृत गर्दै लेखेको छ, ‘भारतले जे गर्‍यो, मेरो विचारमा त्यो आवश्यक थियो । पाकिस्तानले आतंकवादलाई पालिरहेको छ । कश्मीर गएर उनीहरुले निर्दोषलाई मारे ।’ उनले यस्तो घटनामा संलग्नलाई त्यसै छाड्न नमिल्ने समेत उल्लेख गरिन् ।

उनले भनिन्, ‘यसलाई त्यसै छाड्न मिल्दैन, र भारतले जस्तो आक्रमण गरिरहेको त्यो स्वभाविक छ । उनीहरुले आतंकवादको अड्डामा आक्रमण गरिरहेका छन् ।’

उनले पाकिस्तानले आफ्नै जनताविरुद्ध पनि आतंकवादी गतिविधि गरिरहेको आरोप लगाइन् । उनले भनिन्, ‘पाकिस्तान आतंकवादका लागि चिनिएको छ । हामीले अहिले कुराकानी गर्दै गर्दा पनि पाकिस्तानले आफ्नै जनतामाथि आतंकवादी गतिविधि गरिरहेको छ ।’