काठमाडौं – सन् २०२३ मा लन्डनको एक रात्रि क्लबमा म्युजिक प्रोडुसर अबे डीअबमाथि भएको आक्रमणको अनुसन्धानले नयाँ मोड लिएको छ । गायक क्रिस ब्राउनका साथी र्‍यापर हुडीबेबी पनि अनुसन्धानमा तानिएका हुन् ।

म्युजिक प्रोडुसर अबे आक्रमणपछि अचेत भएका थिए । सुरुवाती अनुसन्धानमै प्रहरीले यो घटनाको पीडकका रुपमा अमेरिकी गायक क्रिस ब्राउनलाई लिँदै आएको थियो । उनले मदिराको बोतल प्रहार गरेर अबेलाई अचेत अवस्थामा पुर्‍याएको प्रहरीको दाबी थियो ।

क्रिस यो घटनालाई लिएर अहिले लन्डन प्रहरीको हिरातमा छन् । उनीमाथि गम्भीर शारीरिक क्षति पुर्‍याएको अभियोग लागेको छ । साउथवार्क क्राउन अदालतले अर्को सुनुवाइ नहुञ्जेल हिरासतमा राख्न प्रहरीलाई अनुमति दिएको छ । अर्को सुनुवाइ जुन १३ मा हुने अन्तर्राष्ट्रिय मिडिया एएनआईले उल्लेख गरेको छ ।

अहिले भने यस आक्रमणमा संलग्न रहेको आरोपमा क्रिसका साथी र्‍यापर हुडीबेबीलाई पनि प्रहरीले नियन्त्रणमा लिएको छ । उनीमाथि पनि मुद्दा चलाएको छ । हुडीबेबीलाई शनिबार हाजिर गराउन अदालतले आदेश दिएको छ ।

ब्राउन र हुडीबेबी दुवै अहिले कानुनी प्रक्रियामा तानिकाले यो आक्रमण ‘हाइ प्रोफाइल’ घटनामा परिणत भएको छ । यसले यी दुवैको करिअरलाई असर पार्ने टिकाटिप्पणी सुरु भएको छ ।

नभन्दै क्रिसको करिअरमा यसको असर देखा परेको छ । हिरासतमा रहेकाले क्रिसको जुन ८ मा सार्वजनिक हुने भनिएको नयाँ एल्बम ‘ब्रिजी बाउल एक्स एक्स’ प्रभावित हुने देखिन्छ । उनका तय भएका संगितिक भ्रमणहरु पनि अन्योलमा परेका छन् ।