काठमाडौं– पश्चिम अफ्रिकी मुलुक मालीमा सबै राजनीतिक दलमाथि प्रतिबन्ध लगाइएको छ । मालीमा सन् २०२० देखि सैन्य हुन्टाले शासन गरिरहेको छ ।

गत महिना आयोजित राष्ट्रिय सम्मेलनले सैन्य नेता जनरल अस्सिमी गोइटालाई सन् २०३० सम्म राष्ट्रपतिको जिम्मेवारी दिने निर्णय गरेको थियो । उक्त सम्मेलनलाई विपक्षी पार्टीहरुले बहिष्कार गरेका थिए ।

राष्ट्रपति गोइटाले आदेश जारी गर्दै सबै राजनीतिक दलमाथि प्रतिबन्ध लगाउने घोषणा गरेका हुन् । बीबीसीका अनुसार गत वर्षदेखि माली सरकारले राजनीतिक दलमाथि दमन बढाएको थियो ।

गत साता मालीमा लोकतन्त्रको समर्थनमा आयोजित प्रदर्शनमा बन्दुकधारीको समूहले दुई जना विपक्षी नेतालाई नियन्त्रणमा लिएको थियो । ती बन्दुकधारीले आफूलाई प्रहरी अधिकारी बताएका थिए ।

विपक्षी नेतालाई बन्दुकधारीले नियन्त्रणमा लिइएको विषयमा सरकारले कुनै टिप्पणी गरेको छैन । सेनाले सत्तापलट गरेपछि लोकतान्त्रिक निर्वाचनको माग गर्दै आएका राजनीतिक दलले यस निर्णयको तीव्र प्रतिरोध गर्ने अपेक्षा गरिएको छ ।