काठमाडौं- नेपाली राष्ट्रिय क्रिकेट टिमका पूर्वकप्तान सन्दीप लामिछानेले नेपाल क्रिकेट संघ (क्यान) सँगको सम्झौता तोडेका छन् ।

उनले बुधबार सामाजिक सञ्जालमार्फत् क्यानसँगको सम्झौतालाई निरन्तरता दिन नसकिने बताएका हुन् । ‘धेरै सोच विचारपछि मैले यसपटक नेपाल क्रिकेट संघको केन्द्रीय सम्झौतामा नरहने निर्णयमा पुगेको छु,’ उनले लेखेका छन् ।

बुधबार क्यानले स्कटल्याण्डमा हुने आगामी सिरिजमा खेल्ने नेपाली टोलीलाई बिदाइ गरेको केहीपछि सन्दीपले यस्तो निर्णय लिएका हुन् । लामिछानेले आफूलाई क्यानले निरन्तर सहयोग गरेको भन्दै धन्यवाद पनि दिएका छन् ।

उनले धेरै सोचविचारपछि केन्द्रीय अनुबन्ध अन्तर्गत नरहने निर्णय गरेको बताउँदै तर क्रिकेट वा राष्ट्रबाट टाढा हुने कदम नभएको उल्लेख गरेका छन् । उनले भनेका छन्, ‘यो व्यक्तिगत र पेशागत रूपमा अझ परिपक्व हुने दिशातर्फको एक यात्रा हो ।’

उनले नेपाली क्रिकेट र आफ्नो व्यक्तिगत विकासमा क्यानको भूमिका निकै महत्वपूर्ण रहँदै आएको पनि बताएका छन् ।

म स्पष्ट रूपमा भन्न चाहन्छु, ‘सधैँझैँ त्यही जोश र समर्पणका साथ नेपालका लागि क्रिकेट खेलिरहनेछु, । यो गौरव र जिम्मेवारी सधैँ मेरो हृदयमा रहनेछ ।’

उनले जिन्दगी एक यात्रा भएको बताउँदै जहाँ समयसँगै बाटो र जिम्मेवारीहरू पनि रूपान्तरण हुने बताएका छन् । ‘अझै धेरै कुरा बाँकी छ—हेर्न, दिन र बन्न । म यो यात्राका आगामी अध्यायहरूप्रति उत्साहित छु—क्रिकेटसँगै, अनि त्योभन्दा पर पनि ।’

उनले देशप्रतिको निष्ठा र खेलप्रतिको मोह सधैँ आफ्नो कर्मको मूल केन्द्रमा रहने बताएका छन् । ‘कहिलेकाहीँ निर्णयहरू छुट्टिन होइन, बढ्न र उद्देश्य खोज्न गरिन्छ’, उनले भनेका छन्, ‘यात्रा जारी छ—नयाँ ऊर्जा र खुला मनका साथ ।’