काठमाडौं– पाकिस्तानले रफायल लडाकु विमानसँगै भारतको अभिमान पनि ध्वस्त भएको टिप्पणी गरेको छ । पाकिस्तानका सूचनामन्त्री अताउल्लाह तरारले रफायलसँगै भारतको अभिमान पनि ध्वस्त भएको टिप्पणी गरेका हुन् ।

‘यो रफाइलमात्रै होइन, भारतको अभिमान पनि खसेको छ ।’ राष्ट्रियसभामा उनले भने । रफायल लडाकु विमान गुमाएपछि भारतले ‘कायरतापूर्वक’ चालकरहित हवाइ उपकरण ड्रोनको प्रयोग गरेर पाकिस्तानमाथि आक्रमण गरेको बताए ।

उनले आफ्नो मुलुकमा प्रहार भएका २५ वटा ड्रोन ध्वस्त पारेको पनि राष्ट्रियसभालाई जानकारी दिए । उनले कश्मीरको लाइन अफ कन्ट्रोलमा भएको झडपका क्रममा ५० जना भारतीय सैनिक मारिएको पनि दाबी गरे ।

उनले पछिल्ला विकसित घटनाक्रमसँगै पाकिस्तानी सेनालाई पूर्ण अख्तियारी दिएको उल्लेख गर्दै उपयुक्त समय र स्थानमा भारतलाई कठोर जवाफ दिइने उल्लेख गरे ।

यसअघि पाकिस्तानले भारतीय वायुसेनाको तीन वटा रफायलसहित ५ लडाकु विमान खसालेको दाबी गरेको थियो । भारतले पाकिस्तानी दाबीबारे मुख खोलेको छैन ।