काठमाडौं– भारत र पाकिस्तानबीच आक्रमण र प्रत्याक्रमण जारी रहेका बेला पाकिस्तान सुपर लिग पीएसएलको खेल प्रभावित भएको छ ।

बिहीबार आयोजना हुने तय भएको कराँची किङ्ग्स र पेशावर जालमीबीचको खेल भारतीय आक्रमणका कारण स्थगित भएको हो ।

पाकिस्तान क्रिकेट बोर्डका अधिकारी, टिमका मालिक र खेलाडीको बैठकले खेल स्थगित गर्ने निर्णय गरेको पाकिस्तानबाट प्रकाशित हुने द एक्सप्रेस ट्रिब्युन अखबारको अनलाइन संस्करणले जनाएको छ । सुरक्षा अवस्था र क्षेत्रीय तनावलाई ध्यानमा राख्दै खेल स्थगित गरिएको ट्रिब्युनले उल्लेख गरेको छ ।

खेलाडीको सुरक्षा र बन्दोबस्तीको जटिलतालाई ध्यानमा राख्दै पीएसएलका आगामी १० खेल कराँचीमा सार्ने तयारी भइरहेको स्रोतलाई उद्धृत गर्दै समाचारमा जनाइएको छ ।

रावलपिण्डी क्रिकेट रंगशालामा भारतीय ड्रोन दुर्घटना भएपछि पीएसएलमा उच्च सुरक्षा सतर्कता अपनाइएको छ ।