काठमाडौं– जलविद्युत कम्पनीको प्रारम्भिक सार्वजनिक निस्काशन (आईपीओ) जारी गर्ने सम्बन्धमा कमिसनको चलखेल भएको भन्ने विषयमा विभिन्न हाइड्रोपावर कम्पनी र अन्य कम्पनीले विरोध जनाएका छन् । कम्पनीहरूले विज्ञप्ति जारी गर्दै आफ्ना कम्पनीहरूले तोकिएको कानूनी प्रक्रिया पूरा गरी आईपीओ जारीका लागि स्वीकृति लिएको जनाएका छन् ।

पियोर इनर्जी लिमिटेडले बुधबार प्रेस विज्ञप्ति जारी गर्दै केही अनलाइन सञ्चार माध्यमहरूमा प्रकाशित समाचारमा सो कम्पनीलाई आधारहीन, तथ्यहीन र भ्रामक रूपमा उल्लेख गरिएको भन्दै ध्यानाकर्षण भएको जनाएको छ । साथै, समाचारमा उठाइएका विषयवस्तुहरूसँग पियोर इनर्जीको प्रत्यक्ष वा अप्रत्यक्ष रूपमा कुनै पनि सम्बन्ध नरहेको र पियोर इनर्जी जलविद्युत कम्पनी समेत नभएको जनाएको छ ।

विकास हाइड्रोपावर कम्पनीले पनि कमिसन बुझाएर मात्र अनुमति पाएको भन्ने भ्रामक समाचारप्रति कम्पनीको ध्यानाकर्षण भएको जनाएको छ । ‘हामीले कुनैपनि व्यक्तिलाई अनुचित लाभ हुने कार्य नगरी नियमानुसार स्वीकृति प्राप्त गरेको व्यहोरा जानकारी गराउँदछौँ’, विकास हाइड्रोको विज्ञप्तिमा उल्लेख छ ।

यसैगरी, सान्भि इनर्जी लिमिटेडले पनि विज्ञप्ति जारी गर्दै शेयर निष्काशनको बारेमा प्रकाशित समाचारहरूप्रति आफ्नो कम्पनीको ध्यानाकर्षण भएको जनाएको छ । सो कम्पनीले विधिवत रूपमा तोकिएको कानूनी प्रक्रिया पूरा गरेर सुरु शेयरको सार्वजनिक निष्काशन गरेको भन्दै प्रकाशित समाचारको खण्डन गरेको छ ।

अहिले ८९ वटा हाइड्रोपावर कम्पनीहरू आईपीओ जारी गर्नको लागि नेपाल धितोपत्रबोर्डमा निवेदन दिएर बसेका छन् ।

हाइड्रोपावर कम्पनीले आईपीओ जारी गर्नका लागि नेपाल धितोपत्र बोर्डका पदाधिकारीले कमिसन मागेको विषयलाई जोडेर केही सञ्चार माध्यममा समाचार प्रकाशित भएका थिए ।

सोही विषयलाई लिएर अख्तियार दुरुपयोग अनुसन्धान आयोगले पनि बुधबार बोर्डमा आवश्यक जानकारी लिने काम गरेको बोर्डका अधिकारीहरूले बताएका छन् ।