काठमाडौं– स्टक ब्रोकर एशोसिएसन अफ नेपालको टोलीले नेपाल धितोपत्र बोर्डका पदाधिकारीलाई भेट गरेको छ । एशोसिएनको अध्यक्ष सागर ढकालको सहितको टोलीले बोर्डका अध्यक्ष सन्तोषनारायण श्रेष्ठसँग भेट गरेका छन् । 

सोमबार बोर्डको कार्यालय ललितपुरमा धितोपत्र दलाल व्यवसायीले प्रदान गर्ने सेवालाई थप विस्तारित एवम् प्रभावकारी बनाउने सम्बन्धमा छलफल भएको थियो । 

ब्रोकरहरूको चुक्ता पुँजी २० करोड रुपैयाँ पुर्‍याउन दिएको समय जेठबाट सकिँदै छ । त्यस अगाडि बोर्डका अध्यक्ष श्रेष्ठसँग ब्रोकरहरूले समय थपको माग गर्दै भेट गर्न गएका थिए । 

भेट सकारात्मक रहेको एशोसिएनका अध्यक्ष ढकालले जानकारी दिएका छन् । ब्रोकरको तर्फबाट पुँजी बढाउन समय थप र ब्रोकरलाई अन्य सेवाहरू पनि थप दिनुपर्ने मुख्य माग रहेको ढकालले जानकारी दिए । 

उनका अनुसार अध्यक्ष श्रेष्ठले एउटा कमिटी बनाएर ऐन संशोधनको विषयमा काम गर्ने ब्रोकरलाई प्रतिबद्धता गरेको बताए । ‘अध्यक्ष ज्यूले एउटा कमिटी बनाएर जाने भन्नुभएको छ’, ढकालले भने, ‘हाम्रो माग सम्बोधन हुन्छ ।’

ब्रोकरहरूले पुँजी व्यक्तिको समय थप हुनुपर्ने माग गर्दै आएका छन् । धितोपत्र बोर्डले मर्जरको उपाय दिए पनि अहिलेसम्म कुनैपनि ब्रोकरहरू मर्जरमा जाने घोषणा भने गरेका छैनन् । 

हेर्नुहोस् यस्तो थियो ब्रोकरको माग