काठमाडौं – नेपाल मजदुर किसान पार्टीका सांसद प्रेम सुवालले नेपाल राष्ट्र बैङ्कको गभर्नरका लागि १ अर्ब रुपैयाँ तोकिएको दाबी गरेका छन् ।

सोमबार प्रतिनिधिसभाको बैठकमा बोल्दै उनले यस्तो दाबी गरेका हुन् । एक महिनाअघि नै नियुक्त भइसक्ने गभर्नरको अझै पनि टुंगो नभएको अवस्थामा सांसद सुवालले प्रतिनिधिसभाको बैठकमै यस्तो प्रश्न उठाएका हुन् ।

सुवालले गभर्नरका लागि ४० करोड रुपैयाँ पेश्की बुझाइसकेको तथ्य आएको पनि बताएका छन् ।

प्रतिनिधिसभामा सरकारको नीति तथा कार्यक्रम संशोधनको प्रस्ताव पेश गर्दै सांसद सुवालले यसमा क-कसले लेनदेन गरेका हुन् ? भनेर प्रश्न उठाएका छन् ।

‘एक पूर्वगर्भनरका अनुसार राष्ट्र बैङ्‍कको गभर्नरका लागि एक अर्ब रुपैयाँ तोकिएको र ४० करोड रुपैयाँ पेश्की बुझाइएको सार्वजनिक भयो । यसमा लेनदेन गर्ने को को हुन् ?’, उनले भने ।

सांसद सुवालले नेपाल विद्युत् प्राधिकरण घाटामा गएको हो भने यसको जवाफदेही प्रधानमन्त्री केपी शर्मा ओली र सम्बन्धित मन्त्री हुनुपर्ने बताएका छन् । प्राधिकरणका तत्कालीन कार्यकारी निर्देशक कुलमान घिसिङलाई हटाएर नियुक्त गरिएका हितेन्द्रदेव शाक्यले ५ अर्ब बढी घाटा देखाएपछि सुवालले यस्तो प्रश्न गरेका हुन् ।