काठमाडौं- नेकपा माओवादी केन्द्रका सांसद महेन्द्रबहादुर शाहीले कर्णाली प्रदेश नेकपा (एमाले) कारण भिखारी बन्न पुगेको आरोप लगाएका छन् ।

सोमबार बसेको प्रतिनिधिसभाको बैठकको विशेष समयमा बोल्ने क्रममा उनले कर्णाली गरिब हुनुको दोष एमालेमाथि थोपरेका हुन् ।

कर्णालीकै पूर्वमुख्यमन्त्रीसमेत रहेका शाहीले त्यहाँका जनताले खान पाएका थिएनन् भनेर बदनाम गर्न खोजिएको बताएका छन् ।

नेकपा एमालेका महासचिव शंकर पोखरेलले गत चैत २६ गते सुर्खेतमा आयोजित एमालेको जागरणसभामा कर्णालीका जनताले गणतन्त्र आएपछि मात्रै खान पाएको बताएका थिए ।

पोखरेलले ‘गणतन्त्र आएपछि मात्रै कर्णालीका मान्छेले भात खान पाएका हुन्’ भनेर दिएको अभिव्यक्तितिर लक्षित गर्दै शाहीले एमालेका कारण गरिबी बढेको आरोप लगाए ।

‘कर्णाली प्रदेशका जनताले भात खान पाएका थिएनन् भनेर जिम्मेवार नेताहरू नै बोलेर हिँड्छन् । कर्णाली प्रदेश साँच्चिकै सम्पन्नमध्ये हो’, उनले भने, ‘तर सम्पन्न कर्णाली प्रदेश एमालेकै कारण भिखारी भयो ।’

उनले राष्ट्रिय र अन्तर्राष्ट्रिय गैरसरकारी संस्था छिरेपछि कर्णाली प्रदेशको झन् बदनाम गरिएको बताए । ‘एनजीओकै कारण कर्णाली गरिब भयो’, उनले भने, ‘कर्णालीको गरिबी देश-विदेशमा बेचेर खाने काम भयो । त्यहाँका फोटो लगेर संसारभर बेचेर खाने काम गरियो । यसरी कर्णालीको बदनाम गरियो ।’

यसअघि गत चैत २६ गते एमाले महासचिव पोखरेलले दिएको अभिव्यक्ति विवादमा परेको थियो । उनले कर्णालीको इतिहास नबुझी होच्याएर बोलेर त्यहाँका बासिन्दाको अपमान गरेको भन्दै आलोचना भएको थियो ।

‘दशैँका बेला एकमाना चामल पायो भने टीका लगाउन पाइन्थ्यो भन्ने कर्णालीबासी आज चामलको भात खान सक्ने भएका छन्,’ उनले चैत २६ गते सुर्खेतमा भनेका थिए, ‘के कारणलेभन्दा जिल्ला–जिल्लामा बाटो पुगेको छ । त्यो के कारणले कर्णालीबासीले अहिले भात खान पाएका छन् । यो सबै गणतन्त्रको कारण हो ।’