चलचित्र ‘क्याप्टेन’ बाट नेपाली फिल्म उद्योगमा डेब्यु गरेकी अभिनेत्री उपासना सिंह ठकुरी पछिल्लो समय चर्चामा छिन् । उनले अभिनय गरेको दोस्रो चलचित्र ‘कबड्डी ३’ प्रदर्शनका क्रममा छ । उक्त फिल्ममा उपासनालाई दयाहाङ राईको अपोजिटमा देख्न पाइनेछ ।

दुई फिल्ममा अभिनय गरेर हजारौं फ्यान कमाएकी उपासनाले यो चलचित्रमा काम गर्न पाउँदा धेरै कुरा सिक्ने अवसर पाएको बताउँछिन् । उनी भन्छिन् – ‘कबड्डी ३’ मा काम गर्दा मैले धेरै कुरा सिक्ने अवसर पाएँ । अभिनय निखार्ने मौका पाएँ ।

आफू सौगात मल्लको प्रशंसक भएको बताउने उपासनाले ‘कबड्डी ३’ बाट अफर आएपछि निर्देशक रामबाबु गुरुङलाई पनि यो फिल्ममा सौगात मल्ल हुनुहुन्छ कि हुनुहुन्न भनेर सोधेको बताउँछिन् ।

आफ्नो सुन्दरताका कारण फ्यानको दिल जितेकी उपासना ‘कबड्डी ३’ बाट पनि उत्तिकै आशावादी छिन् । चलचित्र ‘क्याप्टेन’ मा पनि उनले निभाएको भूमिकामा तारिफ पाएकी उपासना सामाजिक सञ्जालमा पनि उत्तिकै सक्रिय रहने गर्छिन् ।

तस्वीरहरू: अदिप श्रेष्ठ