काठमाडौं – पूर्वराजा ज्ञानेन्द्र शाहले जम्मु–कश्मीरको पहलगाममा २२ अप्रिलमा भएको आतंकवादी आक्रमणप्रति दुःख व्यक्त गरेका छन् । उनले घटनामा ज्यान गुमाएका नेपाली नागरिकसहित सबै दिवंगत भएकाहरूप्रति श्रद्धाञ्जली अर्पण गरेका छन् ।

पूर्वराजाको तर्फबाट जारी गरिएको समवेदना सन्देशमा भारत र भारतीय सरकारप्रति समेत गहिरो सहानुभूति प्रकट गरिएको छ ।

सन्देशमा भनिएको छ, “वसुधैव कुटुम्बकम्” को आदर्श अवलम्बन गर्ने सनातनी वैदिक हिन्दू धर्मावलम्बीहरूको मान्यता अनुसार यस्ता जघन्य अपराधहरूलाई धर्मले कहिल्यै स्वीकार गर्दैन। सम्पूर्ण विश्वसमुदाय र हिन्दू समाजले यस्ता घटनाको कडा भर्त्सना गर्नुपर्ने उल्लेख गरिएको छ।

शाहका सम्वाद सचिव डा. फणिराज पाठकद्वारा जारी गरिएको सन्देशमा यस्ता आतंकारी घटनाले विश्वभरि मानवता र धार्मिक सहिष्णुता माथि चोट पुर्‍याउने उल्लेख गरिएको छ ।