काठमाडौं- सशस्त्र प्रहरी बलका ११ जना नायव महानिरीक्षक (डीआईजी) हरूको सरुवा गरिएको छ ।

गृह मन्त्रालयले बिहीबार ६ वटा प्रदेशका प्रमुख हेरफेर गर्दै सरुवा सूची निकालेको हो। सशस्त्र प्रहरी बलका प्रवक्ता कुमार न्यौपाने कोशी प्रदेशको बराह बाहिनीमा सरुवा गरिएका छन् ।

डीआईजी कृष्ण ढकाल मधेश प्रदेशको छिन्नमस्ता बाहिनी, अञ्जनी पोखरेल बागमती प्रदेशको गढीमाई बाहिनी, दीपेन्द्र शाह गण्डकी प्रदेशको मुक्तिनाथ बाहिनी र दीपेन्द्र कुँवर लुम्बिनी प्रदेशको विन्दाबासिनी बाहिनीमा सरुवा भएका छन् ।

कर्णाली प्रदेशका प्रमुख विष्णु भट्ट हाल कंगो मिसनमा रहेकाले सरुवा भएनन् । सदूरपश्चिमको वैद्यनाथ बाहिनीमा प्रदीप पाल सरुवा भएका छन् ।

यसअघि बराह बाहिनीमा रहेका शम्भु सुवेदीलाई स्टाफ कलेजमा लगिएको छ । छिन्नमस्ता बाहिनीबाट कालिदास धौवजी प्रहरी महानिरीक्षकको सचिवालयमा सरुवा भएका छन्।

अब सशस्त्र प्रहरी बलको प्रवक्ताको जिम्मा धौवजीले पाउने छन् । गढीमाई बाहिनीबाट सरुवा भएका गणेश ठाडा मगरलाई कार्यविभाग, मुक्तिनाथ बाहिनीबाट कुलबहादुर नेम्वाङलाई मानवस्रोत र विन्दाबासिनी बाहिनीबाट प्रदीपपाल वैद्यनाथ बाहिनीमा सरुवा गरिएको छ । वैद्यनाथ बाहिनीका दीपक अधिकारी मानवस्रोतमा सरुवा भएका छन् ।