काठमाडौं – जेठ १५ गते प्रदर्शन मिति तोकिएको फिल्म ‘महाभोज’को टिजर सार्वजनिक भएको छ । टिजरमा सहकारीको बचत हिनामिनाको मुद्दा समावेश भएको पाइएको छ ।

फिल्ममा खगेन्द्र लामिछाने र नायिका अञ्जना बराइली जोडीको भूमिकामा रहेको टिजरले खुलाउँछ । उनीहरु आर्थिक संकटमा परेको दृश्यबाट टिजरको सुरुवात हुन्छ । टिजरभर नै यो जोडी यही समस्याबाट ग्रसित देखिन्छ ।

नायक दयाहाङ राईले फिल्ममा ‘चन्द्र’ नामक पात्रको भुमिका निर्वाह गरेको खुलाउँछ । उनी सहकारीसँग सम्बन्धित व्यक्ति हुन्छन् । उनको जोडीको भूमिकामा नायिका गौमाया गुरुङ छिन् ।

नायक आर्यन सिग्देल गाउँपालिका अध्यक्षको भूमिकामा रहेको निर्माण पक्षले खुलाएको छ । टिजरमा आर्यन सिग्देलले एक संवाद ‘चन्द्र’सँग सम्बन्धित छ ।

उनले भन्छन्, ‘चन्द्रेले यहाँ ठूलै गढबढी गरेको छ ।’

टिजरमा ‘हाम्रो पैसा फिर्ता गर’ भन्ने नारा लगाएको सुनिन्छ । यसले चन्द्रको भूमिकामा रहेका दयाहाङले सहकारीको बचत हिनामिना गरेको संकेत गर्छ ।

फिल्मले आर्थिक संकटमा परेको व्यक्ति, सहकारी बचत हिनामिना र त्यसले उत्पन्न समस्यामा कथा उठान गरेको संकेत गर्छ ।

टिजरको अन्त्यमा नायिक मलिका महत कानुनी झमेलामा परेको देखाइएको छ । दयाहाङ आक्रोशित बनेर एक व्यक्तिको घरमा आक्रमण गर्न गएका छन् । यी दृश्यले दर्शकलाई फिल्मप्रति कौतुहलता प्रदान गर्न सक्छ ।

फिल्ममा वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, वीरेन्द्र सिंह कुशवाहलगायतका कलाकारको अभिनय रहेको बताइएको छ ।

क्लक वर्क क्रियशन र पिक्चर फ्रेमको संयुक्त ब्यानरमा निर्माण भएको चलचित्रको निर्माता हिमाल कडरिया हुन् । कथा तथा पटकथा विकास सुवेदीले लेखेका हुन् ।

हेर्नुहोस् टिजर :