काठमाडौं – ‘भ्वाइस अफ नेपाल सिजन ४’बाट युवापुस्ता माझ परिचित रिहान गिरी फिल्ममा व्यस्त बन्न लागेका छन् । उनले गत फागुनमा प्रदर्शनमा आएको ‘होस्टल ३’मार्फत् नेपाली फिल्ममा डेब्यू गरेका हुन् । उनी भुटानी नागरिक हुन् ।

नयाँ कलाकार उत्पादन गर्ने सिरिजका रुपमा होस्टलका श्रृङ्खला स्थापित छन् । नायक अनमोल केसी, नायिका स्वस्तिमा खड्का र नायक सुशील श्रेष्ठ होस्टल श्रृङ्खलाबाटै उदाएका कलाकार हुन् ।

‘होस्टल–३’ले पनि नयाँ कलाकारलाई स्थापित गराउने छनक देखाएको छ । यसका कलाकारहरुलाई अन्य निर्माताहरु फिल्ममा लिन उत्सुक भएको देखिन्छ ।

‘होस्टल–३’का नायक रिहान गिरीले नयाँ फिल्ममा अनुबन्ध भएको गसिप पनि यसबेला सिनेमावृतमा चर्चामा छ । उनी नायिका साम्रागी राज्यलक्ष्मी शाहसँग फिल्म गर्न लागेको बुझिएको छ ।

यस फिल्मको नाम, कलाकार, निर्देशक र छायाङ्कनबारेका जानकारी गोप्य राखिएको छ ।

रिहानको सामाजिक सञ्जाल हेर्दा उनले साम्राज्ञीसँग गर्ने भनेको फिल्मको छायाङ्कन सुरु भएको जस्तो देखिन्छ । उनले पाँचथरको सुभाङमा गाउँमा पुगेर टिकटक बनाइरहेका छन् ।

रिहानले सोमबार सार्वजनिक गरेको एक भिडियोले उनी पाँचथरमा छायाङ्कनमा रहेको पुष्टि हुन्छ । रिहानले एक बच्चा खेलाइरहेका छन् । पृष्ठभूमिमा साम्राज्ञी ग्रामिण महिलाको पहिरनमा देखिन्छन् ।

भिडियोका एक व्यक्तिले भन्छन्, ‘सुटिङ चलिरहेको छ यहाँ ।’ साम्राज्ञी पनि सुटिङको व्यस्त रहे जस्तो देखिन्छ । यसले साम्रागी र रिहानले नयाँ फिल्म गर्न लागेको चर्चालाई बढवा भने दिइको छ ।

तर, उक्त भिडियो फिल्म छायाङ्कनकै हो भनेर यकिन गर्ने अवस्था भने छैन ।