काठमाडौं – एभरेष्ट प्रिमियर लिग (ईपीएल) टि–२० फ्रेन्चाइज प्रतियोगितासँग ग्लोबल ब्रोडकास्टका रुपमा रहेको भारतीय च्यानल डिस्पोर्ट (डिस्कोभरी च्यानल) जोडिएको छ ।

मंगलबार काठमाडौंमा पत्रकार सम्मेलन गरी इपीएलले डिस्पोर्टसँग ३ बर्षका लागि सम्झौता गरेको इपीएलका प्रबन्ध निर्देशक आमिर अख्तरले बताएका छन् ।

ईपीएलका तर्फबाट अख्तर र डिस्पोर्टका तर्फबाट सिईओ दिलीप शर्माले सम्झौता पत्रमा हस्ताक्षर गरेका छन् । घरेलु लिगलाई अन्तर्राष्ट्रिय स्तरमा पुर्‍याउने लक्ष्यसहित ग्लोबल ब्राड्कास्टका रुपमा डिस्पोर्टसँग सम्झौता गरिएको अख्तरले बताए ।

डिस्पोर्टले बंगलादेश प्रिमियर लिग (बीपीएल), पाकिस्तान सुपर लिग (पीएसएल) लगायतका फ्रेन्चाईज प्रतियोगितासँग आबद्ध रहेर प्रत्यक्ष प्रसारण गर्दै आएको छ ।

१३ दिनसम्म चल्ने ईपीएल फागुन १७ देखि चैत १ गते सम्म सञ्चालन हुनेछ । यसअघि ईपीएल मंसिरदेखि पुसमा हुँदै आएको थियो ।