काठमाडौं- चिया नेपालीहरुको जीवनशैलीको अभिन्न हिस्सा हो । बिहान उठ्नेबित्तिकैदेखि अफिस, घरदेखि पाहुनाको सत्कारसम्म चिया चाहिन्छ । तर, धेरै चिया अत्याधिक खानु पनि स्वास्थ्यका लागि राम्रो मानिँदैन । दिनमा ४–५ कपभन्दा बढी चिया पिउने मानिसहरुलाई विभिन्न समस्या हुने चिकित्सकहरु बताउँछन् ।

एसिडिटी र ग्यासको समस्या
चियामा हुने क्याफिनले पेटमा एसिडको मात्रा बढाउँछ । यसले गर्दा पेट दुख्ने, ग्यास्ट्रिक, अपच, वा जलन हुने सम्भावना बढ्छ । यसका लागि सकेसम्म खाली पटेमा चिया पिउनुहुँदैन । त्यसैगरी दूध वा मसला कम हालेको चियाले पनि एसिडिटी र ग्यासको समस्या हुन दिँदैन ।

निन्द्रामा असर
क्याफिनले निद्रा बिगार्छ । अत्याधिक चिया पिउँदा राति निन्द्रा नलाग्ने वा गहिरो निन्द्रा नआउने समस्या हुन्छ। त्यसैले, बेलुकीपख वा राति चिया नपिएकै बेस हुन्छ ।

आइरनको कमी
चियामा ट्यानिन नामक तत्व पाइन्छ । यसले शरीरमा आइरनको अवशोषण घटाउँछ । विशेष गरी शाकाहारीहरूका लागि यसले रक्तअल्पता को जोखिम बढाउँछ ।

दाँतको रंग र स्वास्थ्य
चियाले दाँत पहेँलो बनाउँछ र लामो समयसम्म धेरै चिया पिउँदा दाँतमा प्लाक जम्ने सम्भावना हुन्छ । त्यसैले चिया पिएपछि मुख धुने वा ब्रस गर्ने बानी बसाल्नुहोस्।

नशा र लत
चियाको अत्याधिक सेवनले क्याफिन डिपेन्डेन्स बढाउँछ, जसले गर्दा नपिउँदा टाउको दुख्ने, चिडचिडापन, थकान हुने आदि लक्षण देखिन सक्छन् । त्यसैले विस्तारै चियाको मात्रा घटाउने अभ्यास गर्न सकिन्छ । कहिलेकाहीँ हर्बल टि, तुलसी चिया, वा अदुवाले विकल्प खोज्न सकिन्छ ।