काठमाडौं– पछिल्लो १२ महिनामा भारतमा २२ अर्ब डलर बराबरको आइफोन ‘एसेम्बल’ भएको छ । अमेरिकी प्रविधि कम्पनी एप्पलले अघिल्लो वर्षको तुलनामा भारतमा एप्पलको उत्पादन ६० प्रतिशत वृद्धि गरेको छ ।

भारतीय आर्थिक अनलाइन पोर्टल इकोनोमिक टाइम्सका अनुसार हाल एप्पलले विश्वको कुल उत्पादनमध्ये २० प्रतिशत आइफोन भारतमा उत्पादन गर्दै आएको छ । एप्पलले चीनबाट आइफोनको उत्पादन भारतमा स्थानान्तरण गर्दै आएको छ ।

अमेरिकी राष्ट्रपति डोनाल्ड ट्रम्पले चीनलाई लक्षित गरी भन्सार शुल्क वृद्धि गरेपछि भारतबाट अमेरिकातर्फ आइफोनको निर्यात पनि बढेको जनाइएको छ । हाल एप्पलले प्रायः सबै रेन्जका आइफोन भारतमै एसेम्बल गर्छ ।

भारतमा एप्पलले कुल स्मार्टफोन बजारको ८ प्रतिशत ओगटेको छ । आर्थिक वर्ष सन् २०२४ मा भारतमा एप्पलले ८ अर्ब डलर बराबरको आइफोन बिक्री गरेको छ ।