काठमाडौं– नेपाल स्केटिङ तथा स्केट बोर्डिङ संघको आयोजनामा आठौँ राष्ट्रिय स्केटबोर्ड प्रतियोगिता शुक्रबार सुरु भएको छ ।

प्रतियोगितामा २ सय ५० पुरुष तथा १ सय ५० महिला खेलाडी सहभागी छन् । यस्तै ७ प्रादेशिक टोली प्रतियोगितामा सहभागिता छन् ।

प्रतियोगिता अन्तर्गत पहिलो दिन छनोट चरणको खेल भए । दोस्रो दिन अन्तिम चरणका प्रतियोगिता हुने छन् ।

आयोजक संघका अध्यक्ष अच्युत खनालका अनुसार यो प्रतियोगिता सन् २०२५ मा दक्षिण कोरियाको इन्चोनमा हुने एसियाली च्याम्पियनसिपको छनोटका रुपमासमेत रहेको छ ।

जारी प्रतियोगितामा फ्रीस्टाइल विधाअन्तर्गत वेस्ट ट्रिक र वेस्ट रन स्पर्धाका खेल भएका छन् । शीर्ष ३ स्थानमा रहने खेलाडीले क्रमशः २५ हजार, २० हजार र १५ हजार नगद पुरस्कार प्राप्त गर्ने छन् । दुई दिने प्रतियोगिताका खेलहरू टोखास्थित स्केटर्स नेपाल स्केटपार्कमा जारी छन् ।

कार्यक्रमको औपाचारिक उद्घाटन शनिबार राष्ट्रिय खेलकुद परिषद्का सदस्य सचिव टंकलाल घिसिङले गर्ने छन् ।

प्रतियोगिताका विजेतालाई नेपाल ओलम्पिक कमिटीका अध्यक्ष जीवनराम श्रेष्ठको प्रमुख आतिथ्यतामा पुरस्कार दिने कार्यक्रम छ ।