काठमाडौं– प्रधानमन्त्री केपी शर्मा ओलीले आन्दोलित नेपाल शिक्षक महासंघलाई वार्ताका लागि बोलाएका छन् । 

देशभरका शिक्षकहरू संघीय राजधानी काठमाडौंमा उत्रिएको १७ औँ दिन बितेपछि प्रधानमन्त्री ओलीले वार्ताका लागि महासंघलाई बोलाएका हुन् । 

महासंघका महासचिव तुलबहादुर थापाले शुक्रबार बेलुकी ७ बजे प्रधानमन्त्री ओलीले छलफलका लागि बोलाएको जानकारी दिए । उनले महासंघका प्रतिनिधिहरू छलफलका लागि जाने तयारीमा रहेका जानकारी दिएका छन् ।

‘आज बेलुका ७ बजे सम्माननीय प्रधानमन्त्रीज्यूले आह्वान गर्नुभएको छ । भेट्नका लागि महासंघको टोली जान्छ,’ महासचिव थापाले भने, ‘अहिलेसम्म तयार गरेका कुरा उहाँसमक्ष राख्छौँ ।’ 

उनले शिक्षा ऐन जारी नहुँदासम्म शिक्षकहरूको आन्दोलन जारी रहने पनि बताएका छन् । ‘यो आन्दोलन शिक्षा ऐन जारी नहुन्जेलसम्म चलाइरहन्छौँ,’ महासचिव थापाले भने । 

शिक्षक महासंघको नेतृत्वमा गत चैत २० गतेबाट देशभरका शिक्षकहरू काठमाडौं उत्रिएर आन्दोलित छन् । उनीहरूले माइतीघर–नयाँ बानेश्वर सडकखण्डमा दिनुहँ प्रदर्शन गर्दा काठमाडौंको सवारी व्यवस्थापन अस्तव्यस्त हुने गरेको छ ।