मस्कट– संयुक्त राज्य अमेरिका र इरानबीच वार्ता हुने भएको छ । शनिबार ओमनको राजधानी मस्कटमा दुवै देशका प्रतिनिधिले उच्चस्तरीय वार्ताको तयारी थालेका छन् ।

अमेरिकी राष्ट्रपति डोनाल्ड ट्रम्पले ‘प्रत्यक्ष’ वार्ताको रूपमा वर्णन गर्दा इरानले भने यसलाई तेस्रो पक्षहरूमार्फत मध्यस्थता गरी ‘अप्रत्यक्ष’ रुपमा हुने वार्ताको संज्ञा दिएको छ ।

गत सोमबार ट्रम्पले इरानको आणविक कार्यक्रमबारे ‘प्रत्यक्ष’ वार्तामा संलग्न रहेको जनाएका थिए । तर, मंगलबार इरानका विदेशमन्त्री सैयद अब्बास अराघचीले ओमानमा अप्रत्यक्ष उच्चस्तरीय वार्ता हुन सक्ने उल्लेख गरेका थिए ।

इरानी सञ्चारमाध्यमका अनुसार ओमानमा हुने वार्ताका लागि इरानी विदेशमन्त्री अराघची र मध्यपूर्वका लागि अमेरिकी विशेष दूत स्टिभ विटकफले आ–आफ्नो प्रतिनिधिमण्डलको नेतृत्व गर्नेछन् ।

गत महिना प्रत्यक्ष आणविक वार्ताका लागि ट्रम्पले सार्वजनिक आह्वान गरेका थिए । कूटनीतिक प्रयास असफल भएमा इरानविरुद्ध सैन्य विकल्पहरूमा जाने ट्रम्पले चेतावनी दिएका थिए ।

ओमानले अमेरिका र इरान दुवैसँग लामो समयदेखि मैत्रीपूर्ण सम्बन्ध राख्दै आएको छ । मध्यपूर्वमा तनाव बढ्दै जाँदा ओमनले तटस्थ भूमिका पनि खेल्दै आएको छ ।

सन् २०२० को शुरुमा अमेरिकाले इरानी जनरल कासिम सुलेमानीको हत्या गरेपछि दुई देशबीच ठूलो युद्ध हुने जोखिम बढेको थियो ।