काठमाडौं – चलचित्र विकास बोर्डका अनुसार यो वर्ष चैत १५ सम्म ५७ फिल्म प्रदर्शनमा आए । तीमध्ये ‘आचार्य’ र ‘बुलाकी’ पुन:प्रदर्शनमा आएका हुन् ।

चैत २२ मा फिल्म ‘वसन्त’ आयो । चैत २९ दुई फिल्म ‘कर्मा’ र ‘पिताम्बर’ प्रदर्शनमा आउँदैछन् । यीसमेत जोड्दा यो वर्ष प्रदर्शनमा आएका फिल्मको ६० देखिन्छ ।

यो वर्ष फिल्म ‘पूर्णबहादुरको सारङ्गी’ले ४६ करोड ८० लाखभन्दा बढी ग्रस कलेक्सन गर्यो‍ । यो ग्रस कलेक्सन नेपाली फिल्म इतिहासकै उच्च हो ।

तर, यो वर्ष पनि फ्लप फिल्मको सूची लामै छ । केही फिल्मले एक लाख पनि ग्रस कलेक्सन गरेका छैनन् ।

एक लाख नकमाउने फिल्म

चलचित्र विकास बोर्डका अनुसार यो वर्ष तीन फिल्म सुपरफ्लप भएका छन् । बक्स अफिसमा सबैभन्दा कमजोर सावित भएको फिल्म ‘शीरफूल’ हो ।

यो फिल्म जम्मा ८९ जनाले मात्रै हरेका छन् । यसको ग्रस कलेक्सन १८ हजार पाँच सय मात्रै छ ।

बक्स अफिसमा दोस्रो सुपरफ्लप फिल्म हो, ‘एक्टर’ । यो फिल्मको २६२ वटा मात्रै टिकट बिक्री भएको छ । ग्रस कलेक्सन ३३ हजार २८५ छ ।

अर्को फ्लप फिल्म ‘ब्ल्याक छायाँ’लाई २९४ जनाले हेरेका छन् । यो फिल्मको ग्रस कलेक्सन ६८ हजार ८३५ छ ।

एक लाख ग्रस कलेक्सन गर्न नपाउने अर्को फिल्म ‘आँखा’ पनि हो । यो फिल्मको ग्रस कलेक्सन ९२ हजार ५२५ छ । यो फिल्म असोज ११ गते प्रदर्शनमा आएको थियो ।

असोजमा भारी वर्षाले देशभर ठूलो क्षति भएपछि यो फिल्मको प्रदर्शन स्थगित गरिएको थियो । यो फिल्म पुनःप्रदर्शन गर्ने तयारीमा निर्माण पक्ष रहेको छ ।