काठमाडौं – प्रकाश सपुतको डेब्यू लेखन र निर्देशन रहेको फिल्म ‘वसन्त’ चैत २२ देखि प्रदर्शनरत छ । यो फिल्मले अपेक्षितरुपमा दर्शकबाट साथ पाएको छैन ।

यद्यपि यो फिल्मले सुरुवाती तीन दिनमा एक करोडभन्दा बढी ग्रस कलेक्सन गरेको पाइएको छ । उच्च शो पाएका कारण कम अकुपेन्सीमा पनि यो फिल्मले यति व्यापार गरेको हो ।

फ्लपको खतरामा रहेको यो फिल्म हेर्न दर्शकका लागि केही स:प्राइज छन् । त्यो स:प्राइज गेस्टअपियरेन्स हो ।

फिल्ममा महानायक राजेश हमाल, नायिका करिश्मा मानन्धर, दिलिप रायमाझी, निर्देशक निश्चल बस्नेत, नायिकाहरू प्रियंका कार्की, केकी अधिकारी, सुरक्षा पन्त, नायक नाजिर हुुसेनको गेस्ट अपियरेन्स छ ।

फिल्ममा लोकदोहोरी गायिका शान्तिश्री परियार, मोडल अञ्जली अधिकारीले समेत गेस्ट अपियरेन्स दिएका छन् ।

‘वसन्त’ मा यति धेरै चर्चित कलाकारहरूको अभिनय रहेकाे फिल्मका नायकसमेत रहेका प्रकाश सपुतले यसबारे प्रदर्शनअघि कुनै पनि जानकारी दिएका थिएनन् ।

फिल्ममा प्रकाशसहित नायिका स्वस्तिमा खड्का, खड्गबहादुर पुन, प्रभातपाल ठकुरी, श्रीशिभान्सी, अनुप बराल, प्रकाश घिमिरेलगायतको अभिनय रहेको छ ।

फिल्मका निर्माताहरू मोहन विश्वकर्मा र बिन्दु बोहोरा हुन् ।