काठमाडौं– सहकारीमा बचत डुबेका बचतकर्ताहरूलाई फिर्ता हुन्छ भन्दै भ्रामक एसएमएस र फोन जान थालेको छ ।

समस्याग्रस्त सहकारी व्यवस्थापन समितिको कार्यालयले एक सूचना जारी गर्दै सो समितिको स्वामित्वमा आएका सहकारीका बचतकर्तालाई बचत रकम फिर्ता गर्छौँ भनी भ्रामक हिसाबले एसएमएस र फोन गरिएको जनाएको हो ।

समितिले एक सूचना प्रकाशित गर्दै ‘सहकारी संस्थाका व्यवस्थापनका कार्यहरू हामीबाट हुन्छ भन्दै श्री लालीगुराँस बहुउद्देश्यीय सहकारी संस्था लिमिटेड लगायत यस समितिमा रहेका अन्य समस्याग्रस्त सहकारीहरूका बचतकर्ताको नाममा यस समितिको स्वीकृति बिना भ्रामक एसएमएस, फोन जस्ता माध्यमहरूमार्फत अनाधिकृत कार्यहरू गरिएको प्रति यस समितिको गम्भीर ध्यानाकर्षण भएको छ’ भनेको छ ।

समितिले भ्रामक हिसाबले बचतकर्तालाई एसएमएस पठाउने र फोन गर्ने व्यक्तिलाई कानुनअनुसार कारबाहीको प्रक्रिया अगाडि बढाउने समेत जनाएको छ ।