काठमाडौं– राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले प्रहरी महानिरीक्षक दीपक थापाको निष्पक्षतामाथि प्रश्न उठाएका छन् ।

मंगलबार बल्खुमा आयोजित पार्टीको आमसभालाई सम्बोधन गर्दै उनले प्रहरी प्रमुख थापा नेकपा एमालेनिकट युवा संघको सह-अध्यक्ष रहेको दाबी गरे ।

राजावादी समूहहरूले तीनकुनेमा गरेको प्रदर्शनबारे प्रहरी प्रमुख थापा निर्लज्ज रुपमा प्रस्तुत भएको उनको आरोप छ ।

चैत १५ मा काठमाडौंको तीनकुनेमा भएको हिंसात्मक घटनाको जिम्मेवारी प्रधानमन्त्री केपी शर्मा ओली, गृहमन्त्री रमेश लेखक र प्रहरी प्रमुख थापाले लिनुपर्ने उनले बताए ।

‘प्रधानमन्त्री, गृहमन्त्री र प्रहरी प्रमुख जिम्मेवार छन् । गृहमन्त्रीले आदेश दिए होलान्, प्रहरी चले होलान्, भनेको त, अहिलेको प्रहरी प्रमुख त एमालेको युवा संघको सहअध्यक्ष पो रहेछन् । हामीले भेटेका खोका, अश्रु ग्यासको सेलका बोक्रा, जहाँ एक्सपाइरी डेट २००८ लेखिएको छ, २०१०, १२ लेखिएको छ’, उनले भने, ‘त्यो दुर्गा प्रसाईंहरूले बोकेर ल्याएर हानेको अश्रु ग्यास हो ? अनि त्यो प्रहरी प्रमुख एमालेको प्रतिनिधि भएर निर्लज्जतापूर्वक के भन्छ– हामीले हानेको अश्रुग्यास कसरी डेट एक्पाएर भएको हुन्छ ?’

अध्यक्ष लिङ्देनले प्रहरी प्रमुख थापालाई फुली लगाइदिने दलका नाइकेहरू सधैँ सत्तामा रहँदैनन् भन्ने कुराको हेक्का राख्न आग्रह गरे ।

‘म भन्न चाहन्छु– प्रहरी, प्रहरी भएर बस्नुपर्छ । कुनै राजनीतिक दलको भातृ संगठन भएर बस्ने होइन । तपाईंलाई त्यो फुली लगाइदिने दलका नाइकेहरू र सिफारिस गर्नेहरु सधैँ सत्तामा रहँदैनन्’, उनले भने, ‘तिनीहरूको सधैँ हालिमुहाली चल्दैन । यो कुरा याद राख्नु, प्रहरी, प्रहरी भएर बसेको राम्रो ।’