काठमाडौं– वैज्ञानिकहरुले हजारौँ वर्षअघि लोप भइसकेका ब्वाँसोलाई पुनर्जन्म दिएका छन् । कोलोसल बायोसाइन्सका वैज्ञानिकहरुले आजभन्दा १० हजार वर्षअघि लोप भइसकेको ब्वाँसोको प्रजातिलाई पुनर्जन्म दिएका हुन् ।

वैज्ञानिकहरुले ‘डायर उल्फ’ नाम गरेको ब्वाँसाको यो प्रजातिका तीन छाउराछाउरी उत्पादन गरेका छन् । यीमध्ये रोमुलुस र रेमस नाम गरेका दुई छाउरा ६ महिनाका भए भने खालिसी नाम गरेकी छाउरीको उमेर केबल २ महिनाको छ ।

वैज्ञानिकहरुले प्राचीन डीएनएमा आधारित रहेर डायर उल्फलाई पुनर्जन्म दिएका हुन् । टाइम्सका अनुसार वैज्ञानिकहरुले डायर उल्फको जिनोम अध्ययन गरी खैरो ब्वाँसोको जेनेटिक कोड पुनर्लेखन गरेका थिए । पछि घरपालुवा कुकुरलाई ‘सरोगेट मदर’ का रुपमा प्रयोग गरी वैज्ञानिकहरुले रोमुलुस, रेमस र खालिसीलाई जन्म दिएका हुन् ।

६ महिनाको उमेरमै दुई छाउराको लम्बाइ ४ फिट रहेको टाइम्स म्यागजिनले जनाएको छ । त्यसैगरी, उनीहरुको वजन ८० पाउण्ड अर्थात् ३६ किलो रहेको छ । यी प्रजातिका ब्वाँसा ६ फिट लम्बाइ र १५० पाउण्ड अर्थात् झण्डै ७० किलोसम्म पुग्ने जनाइएको छ ।

यो ब्वाँसो उत्तर अमेरिकामा पाइने कुकुर वर्गका अरु जनावरभन्दा ठूला हुन्छन् । यी प्रजातिका ब्वाँसा प्रायः एक्लै बस्न रुचाउने गरेको टाइम्सले उल्लेख गरेको छ । यी ब्वाँसाहरु आजभन्दा १० हजार वर्षअघिसम्म अमेरिकी महादेशमा पाइन्थ्यो ।

सन् २०२१ मा स्थापना भएको कोलोसल बायोसाइन्सले चाँडै ‘उली म्यामथ’, तास्मानियाली बाघ र डोडोजस्ता जनावरलाई पुनर्जन्म दिने लक्ष्य लिएको छ ।