काठमाडौं – प्रहरीले अरुकै जग्गा बैना गरेर साढे ४५ लाख रुपैयाँ ठगी गरेको आरोपमा एक जनालाई पक्राउ गरेको छ । पक्राउ पर्नेमा सिन्धुपाल्चोकको मेलम्ची नगरपालिका–१ घर भइ काठमाडौं गोकर्णेश्वर नगरपालिका–७ दक्षिणढोका बस्ने ४३ वर्षीय रामकुमार चौलागाईं छन् ।

उनलाई सोमाबार काठमाडौं उपत्यका अपराध अनुसन्धान कार्यालयको टोलीले दक्षिण ढोकाबाट पक्राउ गरेको हो । अर्कैले प्लटिङ गरेको जग्गालाई आफ्नो भनी ४५ लाख ५० हजार रुपैयाँ बैना समेत लिएर उनी फरार भएको थिए । उनले पीडितलाई सस्तो राम्रो मूल्यमा घडेरी रहेको, घर बनाउन पनि मिल्ने पछि बेचे राम्रो मूल्यमा आउँछ भनि प्रलोभन देखाएको प्रहरीले जनाएको छ ।

पक्राउ परेका चौलागाईंविरुद्ध यसअघि पनि जिल्ला प्रहरी परिसर तथा मातहतका बिभिन्न प्रहरी कार्यालयहरुबाट जम्मा ८ वटा ठगी तथा बैंकिङ कसूर सम्बन्धी मुद्दाहरु रहेका पाइएको छ । जसमा एक करोड ६४ लाख ८५ हजार बिगो रहेको पाइएको छ ।