काठमाडौं – नायका खगेन्द्र लामिछाने र नायिका वर्षा राउतको केन्द्रीय भूमिकामा रहेको फिल्म ‘हर्ष’ को छायाङ्कन पूरा भएको छ ।

४० दिनको तालिका लिएर निर्देशक एकता पौडेल फागुनमा छायाङ्कनमा निस्किएकी थिइन् । निर्धारित समयभन्दा ५ दिन अगावै फिल्मको छायाङ्कन सकिएको हो ।

कलाकार र प्राविधिकको उत्साहपूर्ण कामले छायाङ्कन चाँडै सकिएको निर्देशक पौडेलको बुझाइ छ । उनले भनिन्, ‘फिल्मका ५ गीत र सबै छायाङ्कनको काम पूरा भइसकेको छ ।’

उनका अनुसार यो फिल्मको छायाङ्कन चितवन जिल्लाभित्र मात्रै गरिएको छ । पोस्ट प्रोडक्सनको काम सकेर मात्रै फिल्मको प्रदर्शन मिति तोक्ने तयारीमा निर्देशक पौडेल रहेकी छन् ।

‘हर्ष’ पौडेलको डेब्यू फिल्म हो । उनी अमेरिकामा फिल्म निर्माण पढेर आएकी हुन् । उनीसँग विभिन्न सर्ट फिल्म निर्माण गरेको अनुभव छ ।

पारिवारिक सामाजिक कथा पस्किने यस फिल्मको कथा उनले आफैँले लेखेकी हुन् । ई-प्राइम मुभिज र अष्टलक्ष्मी प्रोडक्सन ब्यानरमा निर्माण भएको यस फिल्मका निर्माता प्रशन्न पौडेल र विकास पौडेल हुन् ।