कैलाली- कैलालीको घोडाघोडी बहुमुखी क्याम्पसको स्वतन्त्र विद्यार्थी युनियनमा अनेरास्ववियु विजयी भएको छ । शनिबार भएको मतदानको आइतबार आएको नतिजाअनुसार अनेरास्ववियुका अशोक गौतम विजयी भएका हुन् ।

कुल एक हजार ६९१ जना मतदाता रहेको यस क्याम्पसमा गौतमले ६७० मत ल्याउँदै पहिलो पटक अनेरास्ववियुलाई जित दिलाएका हुन् ।

उनका निकटतम् प्रतिद्वन्द्वी अखिल क्रान्तिकारीका गणेश भण्डारीले ४२८ मत ल्याएका छन् । सचिवमा नेविसंघका प्रविण भण्डारी ५५५ मतसहित विजयी भएका छन् ।

उनीसँग नेकपा एकीकृत समाजवादीनिकट अनेरास्ववियूका भुवनराज जैसी ४९० मत ल्याउँदै पराजित भए । उता कोषाध्यक्षमा अनेरास्ववियुका सञ्जीवकुमार चौधरी ५६९ मतसहित विजयी भए । उनीसँग अखिल क्रान्तिकारीकी यालिशा कुमारी कुँवर ४१६ मतसहित पराजि भइन् ।

यो क्याम्पसमा विगतमा अखिल क्रान्तिकारीले स्ववियुमा जित निकाल्ने गरेको थियो । उक्त क्याम्पसमा यसपटक संयुक्त प्यानलबीच कडा प्रतिस्पर्धा देखिएको थियो ।

यहाँ अखिल क्रान्तिकारीका गणेश भण्डारी अध्यक्ष रहेको प्यानलले अन्य तीन सङ्गठनलाई समेटेर संयुक्त प्यानल बनाएको थियो । नेपाल विद्यार्थी सङ्घसहितको संयुक्त प्यानलबाट अनेरास्ववियुका अशोक गौतम अध्यक्षमा थिए । उता अनेरास्ववियूका यामबहादुर खत्रीको छुट्टै प्यानल थियो ।