काठमाडौं– अमेरिकाले भन्सार महशुल बढाएपछि चीनले पनि अमेरिकी सामानमा भन्सार महशुल वृद्धिको घोषणा गरेको छ । चिनियाँ वाणिज्य मन्त्रालयले विज्ञप्ति जारी गर्दै अब अमेरिकाबाट आयात हुने सबै सामानमा ३४ प्रतिशत भन्सार महशुल वृद्धि गर्ने घोषणा गरेको हो ।

यसअघि अमेरिकी राष्ट्रपति ट्रम्पले बुधबार विशेष सम्बोधन गर्दै विभिन्न मुलुकका सामानमाथि विभिन्न दरमा भन्सार महशुल वृद्धि गर्ने घोषणा गरेका थिए । ट्रम्पले चिनियाँ सामानमाथि थप ३५ प्रतिशत भन्सार महशुल बढाउने जनाएका थिए ।

त्यसैगरी, चीनले खासगरी ‘रेअर अर्थ मेटेरियल्स’ भनिने प्रविधिको क्षेत्रमा महत्वपूर्ण पदार्थको निर्यातमा कडाइ गर्ने भएको छ ।

चीनले अमेरिकातर्फ समारियम, गाडोलिनियम, टेर्बियम, डायस्पोरियम, लुटेटियमजस्ता पदार्थको निर्यातमा कडाइ गरेको समाचार संस्था रोयटर्सले जनाएको छ ।

चीनले १६ वटा अमेरिकी कम्पनीलाई ‘निर्यात नियन्त्रण सूची’ राखेको र अरु ११ वटा कम्पनीलाई ‘अविश्वसनीय संस्था’ को सूचीमा राखेको रोयटर्सले जनाएको छ ।