काठमाडौं – गत असोज ३ गते प्रदर्शनमा आएको हिट फिल्म ‘खुस्मा’ टिमले नयाँ प्रोजेक्ट सुरुवात गरेको छ । यो टिमले नयाँ फिल्म ‘जलाकी’को छायाङ्कन सुरु गरेको हो ।

खुम्साका निर्देशक अशोक थापा मगरले नै यस फिल्मको निर्देशन गर्दैछन् । नायिकामा उपासना सिंह ठकुरी दोहोरिएकी छन् ।

नायकमा भने फिल्म ‘साम्बाला’का नायक सोना तोप्देन रहेका छन् । अस्तित्व भट्टचन र आकृति राजभण्डारी मुख्य भूमिकामा रहने निर्माण पक्षले जनाएको छ ।

‘आकृति’ गायक सुशान्त केसीको चर्चित गीत ‘बार्दली’का मोडल हुन् । ‘जलाकी’ उनले फिचर फिल्ममा डेब्यू गर्न लागेकी हुन् ।

उनीहरुसहित माओत्से गुरुङ, बुद्धि तामाङ, सङ्गीता थापा मगर, राजु रेग्मी मगर, खड्कबहादुर पुनलगायतका कलाकारको अभिनय रहने बताइएको छ ।

निर्माण पक्षले शुक्रबार फिल्मको ‘टाइटल मोसन पोस्टर’ सार्वजनिक गरी फिल्म निर्माणको घोषणा गरेको हो । शुक्रबारदेखि नै यो फिल्मको छायाङ्कन बागलुङबाट सुरु भएको छ ।

निर्देशक थापाका अनुसार यो फिल्मको छायाङ्कन रुकुम, म्याग्दी, बागलुङ, पोखरा र दक्षिण कोरियामा हुनेछ ।

निर्देशक थापाले यो पटक पनि मगर समुदायको कथा नै दर्शक समक्ष ल्याउन लागेका हुन् ।