काठमाडौं- हुन्डी कारोबारमा संलग्न एकजना चिनियाँ नागरिकलाई प्रहरीले २० लाख ९२ हजार रूपैयाँसहित पक्राउ गरेको छ।

बुधबार बेलुका साढे ५ बजेको समयमा काठमाडौंको महाबौद्धमा हुण्डी कारोबार भइरहेको सूचनाका आधारमा प्रहरी वृत्त जनसेवाको टोलीले उनलाई उक्त परिमाणको रकमसहित पक्राउ गरेको हो ।

पक्राउ पर्नेमा चीनको तिब्बत निावसी २६ वर्षीया रिक्से वाङ्मो रहेको जिल्ला प्रहरी परिसर काठमाडौंका प्रवक्ता एसपी अपीलराज बोहोराले बताए । बोहोराका अनुसार उनी स्थायी रुपमा भारतको हिमाचल प्रदेशस्थित जोगिन्दरनगरको सुजा गाउँमा बस्दै आएकी थिइन् ।

उनलाई काठमाडौं जिल्ला अदालतबाट ४ दिनको म्याद थप गरेर अनुसन्धान भइरहेको उनले बोहोराले बताए ।

उनको साथबाट १ हजार दरको ११८३ थान जम्मा ११ लाख ८३,००० हजार रुपैयाँ, ५०० दरको नोट थान १८१८ जम्मा ९ लाख ९ हजार रुपैयाँ बरामद भएको छ । त्यसैगरी आईफोन एकथान पनि बरामद भएको छ ।