काठमाडौं- नेपाल प्रहरीले गत शुक्रबार दुर्गा प्रसाईं र नवराज सुवेदी नेतृत्वको राजावादी समूहले गरेको प्रदर्शनमा भएको हिंसाका क्रममा कुनै पनि घरको छतमा सुरक्षाकर्मी नचढेको जनाएको छ ।

प्रहरी प्रवक्ता एवम् डीआईजी दिनेशकुमार आचार्यले बुधबार पत्रकार सम्मेलन गर्दै तीनकुनेका कुनै पनि घरको छतमा पसेर टियर ग्यास नहानिएको जवाफ दिएका हुन् ।

‘प्रहरी टोलीका सदस्य तीनकुनेका कुनै पनि घरको छतमा त्यस दिन पसेका थिएनन्’, उनले भने, ‘जहाँसम्म टियर ग्यास हानेको कुरा छ । यसमा बुझ्नुपर्ने प्राविधिक कुरा के हो भने टियर ग्यास जहिल्यै तलबाट माथि हानिन्छ । माथि हानिएपछि टियर ग्यासको गोला तल आएर खस्छ । गोली चाहिँ सीधा हान्ने हो ।’

शुक्रबारको प्रदर्शन हिंसात्मक हुनुको मुख्य कारण नै दुर्गा प्रसाईं भएको आचार्यले बताएका छन् ।

डीआईजी आचार्यले पत्रकार सुरेश रजक थुनिएको तीनकुनेस्थित मार्बल हाउसमा राजावादीले दमकल समयमै पुग्न नदिँदा बचाउन नसकिएको उल्लेख गरे ।

‘सुरेश रजकलाई बचाउन सकिन्थ्यो तर राजावादीले दमकल छिर्नै दिएनन्’, उनले भने, ‘आगो निभाउन गएको दमकलमाथि उल्टै तोडफो गरियो । त्यहीकारण रजकलाई बचाउने हाम्रो प्रयास सफल हुन सकेन ।’