काठमाडौं– प्रधानमन्त्री केपी शर्मा ओलीले पूर्वराजा ज्ञानेन्द्र शाहले आफ्नो निवासमा बोलाएर विवादित मेडिकल व्यवसायी दुर्गा प्रसाईंलाई ‘जनकमान्डर’ तोकेको दाबी गरेपछि राष्ट्रिय प्रजातन्त्र पार्टी (राप्रपा)ले आपत्ति जनाएको छ ।

प्रतिनिधिसभाको सोमबारको बैठकलाई सम्बोधन गर्दै प्रधानमन्त्रीले राष्ट्रममा उभिएर प्रसाईंको नाम उल्लेख नगरी पूर्वराजाले आफ्नो निवासमा बोलाएर ‘जनकमान्डर’ तोकेको दाबी गरेपछि राप्रपाका सांसदहरूले आपत्ति जनाएका हुन् ।

प्रधानमन्त्री ओलीले ‘र, चैत १४ गते समाज बिथोल्न लागिपरेका एकजना अवाञ्छित व्यक्तिलाई आफ्नै निवासमा डाकेर कथित ‘जनकमान्डर’ तोक्नुभयो र हिंसात्मक वारदातका लागि खटाउनु भयो’ भनेलगत्तै राप्रपाका सांसदहरूले बसेको स्थानबाट उत्रिएर होहल्ला गरेका थिए ।

तर, प्रधानमन्त्री ओली रोकिएनन् । उनी लिखित धारणा पढ्दै अघि बढिरहे । राप्रपाको हो–हल्लाबाट ध्यानाकर्षण भएजस्तो गरेर सभामुख देवराज घिमिरेले भने, ‘माननीय सदस्य आशन ग्रहण गर्नुस् ।’

उनले यसो भनिरहँदा राप्रपाका सांसदहरू ज्ञानेन्द्रबहादुर शाहीसहित तीनजना सांसदहरू आशनबाट उठेर बोलिरहेका थिए ।

फेरि सभामुख घिमिरेले प्रधानमन्त्री ओलीलाई मन्तव्य रोक्न आदेश दिए । भने, ‘प्रधानमन्त्री आफ्नो मन्तव्य रोक्नुस् । र, के, प्रधानमन्त्री । तर, प्रधानमन्त्री ओली रोकिएनन्, उनी बोलिरहे ।

प्रधानमन्त्रीले रोकिने आदेश नमानेपछि सभामुख घिमिरे फेरि राप्रपाका सांसदहरूलाई आशन ग्रहणका लागि आग्रह गर्न पुगे । ‘माननीय सदस्य यहाँहरू आशन ग्रहण गर्नुस्,’ उनले भने, ‘प्रधानमन्त्रीले समय पाउनुभएको छ, उहाँले बोलिरहनुभएको छ । माननीय सदस्यहरू आशन ग्रहण गर्नुस् ।’

सभामुखले यसो भनिरहँदा राप्रपा सांसद शाही डायरी हातमा उचालेर केही भनिरहेको दृष्य देखिएको थियो । तयसपछि प्रधानमन्त्री ओलीले लिखित मन्तव्य पाढ्न रोकेर आक्रोशित हुँदै भने, ‘नियमावलीको होइन यहाँ । संविधान उल्लंघन गर्ने कुरा, व्यवस्था मास्ने कुरासँग म प्रश्न उठाइरहेको छु । यस देशमा सबैले संविधान मान्नुपर्छ । व्यवस्था मान्नुपर्छ । हो–हल्ला गरेका भरमा राजनीति र संसद् सबैलाई अबरोध गर्ने काम गर्न मिल्दैन ।’

प्रधानमन्त्री ओलीले राप्रपाका प्रति आक्रोश गर्दै यस्तो भनिरहँदा सत्ता साझेदार नेपाली कांग्रेसका सांसदसँगै नेकपा एमालेका सांसदहरू टेबल ठोकेर समर्थन गरिरहेका थिए ।