सुनसरी – इटहरी बजारस्थित मुख्य चोकमै रहेको व्यवसायिक भवन सेन्ट्रल प्लाजामा आगो लागेपछि अड्किएकाको अहिले उद्धार चलिरहेको छ।

काठमाडौंबाट गएको नेपाली सेनाको हेलिकप्टरले उनीहरूको उद्धार गरिरहेको छ । इटहरीका व्यवसायी राजेश श्रेष्ठले यो भवन निर्माण गरेका हुन्।

प्लाजामा फसेकाहरूमध्ये अहिलेसम्म ८ जना पुरुष र ३ जना महिलाको उद्धार गरिएको छ । उद्धार गरिएकाबाहेक बाहिरबाट अन्य मानिस नदेखिएका गृहमन्त्रालयले जनाएको छ ।

उद्धार गरिएकालाई नेपाली सेनाको पूर्वी पृतना हेडक्वाटर इटहरीमा राखिएको छ। प्रहरीका अनुसार उक्त भवनको पाँचौँ तलाबाट आगो लागेको हो ।

अहिले भवनभित्र प्रहरीसहितको उद्धार टोलीले आगो निभाउने र मानिसको खोजी पनि एकसाथ गरिरहेको छ । आगो लागेपछि भवनमा केही मानिस फसेकाले उद्धारका लागि हेलिकोप्टर मगाइएको थियो। त्यसपछि गृहमन्त्रालयले नेपाली सेनाको हेलिकोप्टर पठाएको थियो।

अहिले आगलागी नियन्त्रणका लागि चारवटा दमकल र प्रहरी परिचालन गरिएको छ। यो सेन्टर प्लाजामा होटल बरण्डा, क्युएफएक्स हल, लक्ष्मी सनराइज बैंकलगायत व्यवसाय सञ्चालित छन् ।