काठमाडौं – आठौं संस्करणको नेपाल अन्तर्राष्ट्रिय चलचित्र महोत्सव (निफ)मा नायकको अवार्ड आरके मेहेता र उत्कृष्ट नायिका अवार्ड अञ्जना बराइलीले जितेका हुन् ।

निफको समापन कार्यक्रममा सोमबार उनीहरुलाई अवार्ड र प्रमाणपत्र प्रदान गरिएको हो । मेहेताले फिल्म ‘आँखा’ र अञ्जनाले फिल्म ‘पुजार सार्की’बाट उक्त अवार्ड जितेका हुन् ।

त्यस्तै, यो वर्षको उत्कृष्ट फिल्मको अवार्ड भने फिल्म आँखाले नै जितेको छ । यस फिल्मलाई पुरस्कार स्वरुप एक लाख नगद, अवार्ड र प्रमापत्र प्रदान गरिएको छ । उत्कृष्ट निर्देशकको अवार्ड फिल्म ‘पुजार सार्की’बाट दिनेश राउतले जितेका छन् ।

त्यस्तै, उत्कृष्ट न्यारेटिभ फिचर फिल्मको अवार्ड भने मिन भाम निर्देशित फिल्म ‘साम्बाला’ले जिते । यो फिल्मलाई दुई अमेरिकी डलर, प्रमाण पत्र र ट्रफीले सम्मान गरिएको थियो ।

निफमा उत्कृष्ट एआई फिल्म भने ‘दि अवेस’ घोषणा भएको छ । यो अर्जेन्टिनी फिल्मका निर्देशक एन्ड्रेस अलोइ हुन् ।

त्यस्तै, राष्ट्रिय सर्ट फिल्मतर्फ निसान खत्री उत्कृष्ट निर्देशक घोषित भएका छन् । उनले सर्ट फिल्म ‘ए विटनेस फ्रम नेपाल’बाट आवार्ड जितेका हुन् ।

उत्कृष्ट राष्ट्रिय सर्ट फिल्मको अवार्ड निराञ्जनराज भेटवालको निर्देशन रहेको ‘‍द विटनेस ट्री’ले जितेको छ । यस सर्ट फिल्मलाई ५० हजार नगद, अवार्ड र प्रमाण पत्रले सम्मान गरिएको थियो ।

निफको समानपन कार्यक्रममा वरिष्ठ अभिनेतृ मिथिला शर्मा, चैत्य देवी सिंह, नायिका करिश्मा मानन्धर, नायक निखिल उप्रेती, कलाकार दीपकराज गिरी, निर्मल शर्मालगायत उपस्थित थिए ।

कार्यक्रमका प्रमुख अथिति सञ्चारमन्त्री पृथ्वी सुब्बा थिए ।

चैत ७ गतेबाट सुरु भएको निफका लागि ४० देशका ८७ वटा फिल्म छनोट गरिएको थियो । निफका अध्यक्ष केपी पाठकका अनुसार ७० देशका ६ सयभन्दा बढी फिल्मले सहभागिता जनाउन आवेदन दिएका थिए ।