काठमाडौं – खानेपानीमन्त्री प्रदीप यादवले एक वर्षभित्रमा ५७ प्रतिशत नागरिकमा स्वच्छ खानेपानी पुराउने लक्ष्य लिइएको बताएका छन् ।

खानेपानी तथा सरसफाइ उपभोक्ता महासङ्घ, नेपालले सोमबार काठमाडौंमा आयोजना गरेको कार्यक्रममा मन्त्री यादवले खानेपानी तथा सरसफाइ उपभोक्ताहरूलाई समेत साथमा लिएर आगामी वर्षभित्र ५७ प्रतिशत नागरिकमा स्वच्छ खानेपानी पुराउने लक्ष्य लिइएको बताएका हुन् ।

नागरिकलाई स्वच्छ खानेपानी दिनु सरकारको दायित्व भएकाले प्राविधिक टोली खटाएर स्वच्छ खानेपानी उपलब्ध गराइने उनले बताए ।

उनले मेलम्ची खानेपानी विस्तारमा कमजोरी नभएको भन्दै विद्युत प्राधिकरणको कमजोरीका कारण बबरमहलमा पाइप फुटेको बताए ।

त्यस्तै उनले खानेपानी तथा सरसफाइ आधारभूत आवश्यकता मात्र नभइ समग्र समाजको स्वास्थ्य, समृद्धि र विकाससँग गाँसिएको विषय भएको उल्लेख गरे ।

पानीको व्यवस्थापन, सरसफाइको र स्वास्थ्य सुरक्षा कायम राख्ने मुख्य जिम्मेवारी महिलाहरूको काँधमा रहेको उनको भनाइ छ ।