काठमाडौं– नागरिक उन्मुक्ति पार्टीको केन्द्रीय कार्यसमिति बैठकको पहिलो दिनमा २० जना केन्द्रीय सदस्यले धारणा राखेका छन् । १ सय जना केन्द्रीय सदस्यले धारणा राख्ने र निर्णयमा पुग्ने उक्त बैठक उद्घाटन सत्रपछि २० जनाले धारणा राखेर आजको बैठक सकिएको छ । बैठक भोलि पुनः जारी रहने सांसद गंगाराम चौधरीको भनाइ छ । 

चौधरीका अनुसार डा. सीके राउत नेतृत्वको जनमत पार्टीसँग एकताका लागि २० सदस्यमध्ये १५ भन्दा बढीले एकताको पक्षमा धारणा राखेका छन् । 

‘अध्यक्ष ज्यू पनि एकताको विपक्षमा हुनुहुन्छ जस्तो लाग्दैन । आज पनि १५ जनाभन्दा धेरै सदस्यले एकताको पक्षमा बोल्नुभयो ।’ चौधरीले खबरहबलाई भने, ‘भोलिको बैठकमा थप सदस्यले बोलेपछि निर्णय हुन्छ ।’ 

नाउपा संरक्षक रेशम चौधरी एकताको पक्षमा रहे पनि अध्यक्ष रन्जिता श्रेष्ठ त्यसको पक्षमा नभएको देखिएको थियो । तर केन्द्रीय समितिमा बहुमत सदस्यले निर्णय गर्ने भन्दै बैठक डाकिएको हो । 

दुई दिनसम्म चल्ने बैठकमा नागरिक उन्मुक्तिका संस्थापक एवम् संरक्षक रेशम चौधरी पनि सहभागी छन् । 

बैठकले नाउपाले जनमत अध्यक्षमा डा।राउतलाई नै स्विकार्दै जाने या नजाने भन्ने पनि निर्णय गर्ने छ । 

उता जनमतले भने यसअघि नै नाउपासँग एकतामा जाने निर्णय गरिसकेको छ ।