काठमाडौं – मालदिभ्स समृद्ध हुन भारतको सहयोग अपरिहार्य रहेको मालदिभ्सका पूर्वराष्ट्रपतिले बताएका छन् । भारत भ्रमणमा रहेका मालदिभ्सका पूर्वराष्ट्रपति मोहम्मद नशिदले आफ्नो मुलुकको समृद्धि र सुरक्षाका लागि भारतको भूमिका निकै महत्वपूर्ण रहेको बताएका हुन् ।

भारतीय समाचार संस्था एएनआईसँगको कुराकानीका क्रममा पूर्वराष्ट्रपति मोहम्मद नशिदले भारतसँग राम्रो सम्बन्ध नभए मालदिभ्स समृद्ध हुन नसक्ने जिकिर गरे । पछिल्लो समय दुई मुलुकबीचको सम्बन्ध सुमधुर बन्दै गएको पनि उनले बताए ।

हालै चीनसँग हस्ताक्षर गरेको खुला व्यापार सम्झौताका कारण मालदिभ्सको आर्थिक सार्वभौमिकतामा जोखिम उत्पन्न हुने चिन्ताबीच पूर्वराष्ट्रपतिको यस्तो भनाइ आएको हो । मालदिभ्स र चीनबीच ७० करोड अमेरिकी डलर बराबरको द्विपक्षीय व्यापार हुने गरेको बताइन्छ ।

जसमध्ये मालदिभ्सले चीनबाट ९७ प्रतिशत सामान आयात गर्छ भने केबल ३ प्रतिशत सामान निर्याय गर्छ ।