रौतहट- माध्यमिक शिक्षा परीक्षा (एसईई) २०८१ लाई मर्यादित बनाउन प्रशासनले कडाइ गर्दा पहिलो दिनमै रौतहटबाट ठूलो संख्यामा मोबाइल फोन बरामद भएको छ ।

रौतहटका विभिन्न परीक्षा केन्द्रहरूमा परीक्षार्थीले चिट चोर्न प्रयोग गरिएका ४२४ वटा मोबाइल फोन बरामद गरिएको हो ।

विगतका वर्षहरूमा मेसेन्जर, ह्वाट्सएप, भाइबरलगायत ग्रुपहरू प्रयोग गरी चिट चोर्ने प्रवृत्ति देखिएकाले यस वर्ष परीक्षा प्रणाली थप कडा बनाइएको छ ।

प्रविधिको दुरुपयोग रोक्न सुरक्षाकर्मीहरूलाई परीक्षा केन्द्रहरूमा परिचालन गरिएको छ । यद्यपि, परीक्षार्थीहरूले मोबाइल लुकाएर परीक्षा हलमा लैजाने प्रयास गरेपछि विशेष चेकजाँच गरिएको थियो । त्यहीक्रममा त्यतिका परिमाणमा मोबाइल फोन बरामद भएका जिल्ला प्रहरी कार्यालय रौतहटले जनाएको छ।

परीक्षा सुरक्षालाई बलियो बनाउन स्थानीय प्रशासनले विशेष निगरानी राखे पनि यमुनामाई गाउँपालिका-५ स्थित श्री यमुनामाई माध्यमिक विद्यालय, झुन्खुन्वा परीक्षा केन्द्रमा एक परिक्षा निरीक्षक नै परीक्षार्थीहरूले नै रकम लिएर मोबाइल प्रवेश गराएको आरोपमा पक्राउ परेका छन् ।

यसैगरी, मौलापुर नगरपालिका-५ स्थित श्री लक्ष्मिनिया मावि, मौलापुर परीक्षा केन्द्रमा बाहिरबाट चिट पुर्‍याउने एक व्यक्ति पनि पक्राउ परेका छन् । पक्राउ परेका दुवै जनाको नाम खुलाइएको छैन ।